BUTUAN CITY – Miresulta sa kamatayon sa duha ka mga rebelde ang engkuwentrong natigayon tali sa kasundaluhan og New People’s Army sa nakalabay nga adlaw sa may Sitio Vertudazo, Brgy San Juan, Bayugan City, Agusan Del Sur.
Naila ang mga napatay nga sila Alyas Dano ang Regional Finance Officer og Alyas ZIG ang Regional Medical Staff, sa North Eastern Mindanao Regional Committee kansa parehong misurender na kaniadto.
Nasayrang nagpahigayon og Focus Military Operation ang tropa sa 7th Special Forces Company, 3rd Special Forces (Arrowhead) Battalion ilalom sa kadumalahan ni Lt. Col. Paulo F Baylon, og ang Alpha Company sa 65th Infantry Battalion ug 4th Scout Ranger Company, 2nd Scout Ranger Battalion.
Na-engkuwentro sa mga niini ang dili moubos sa 10 ka mga miyembro sa Regional Sentro De Grabidad, sa North Eastern Mindanao Regional Committee.
Lakip sa narekober sa tropa sa gobyerno sa encounter site ang usa ka M4 Carbine Rifle, usa ka Modified Carbine Rifle, nagkadaiyang mga bala og magazines, 12 ka cellular phones, og mga personal nga kagamitan.
