BUTUAN CITY – Nisaka na sa 4 ka patay’ng lawas sa mga rebeldeng New People’s Army kon NPA ang narekober sa nagpadayong pursuit operation sa militar sa Barangay Bunawan Brook, lungsod sa Bunawan, Agusan del Sur.
Kini human unang napalgan ang duha ka patay’ng lawas niadtong weekend sa Sitio Sta Monica, sa maong barangay apan na-claim na kagahapong adlawa sa ilang mga kabanay.
Gi-ila ni Lieutenant Colonel Jaime Datuin, Commanding Officer sa 75th IB ang mga ulahing napalgan nga sila Albert Ramirez Doron alyas Ka Lucas – political guide sa Squad 2, Platoon 1, Guerilla Font 14 ug Mendiano Mique alyas Bager, membro sa Team Baking, Squad 1, Platoon 1, WGF14.
Nasayrang nagsangka ning mi-aging gabie ang duha ka grupo sa Sitio Katipunan sa samang barangay nga miresulta sa kamatayon sa duha kinsa duna’y taas nga posisyon sa Guerilla Front 14 ilawom sa pagdumala ni Arnold Orlanes alyas Ka Jorlan ug pagkarekober sa usa ka AK 47 rifle, usa ka M16 rifle, usa ka rifle grenade, usa ka hand-held radio, mga magazines sa AK47 ug M16 rifles ug mga personal nga gamit sa mga terrorista.
Nilungtad matod pa ug 20 minutos ang pagbinayloay dihang nasubay sa operating team ang lokasyon sa nanibat nga mga rebelde sa Sitio Katipunan human ang engkwentro sa Sitio Sta Monica.
