BUTUAN CITY – Gipa-blotter sa information officer sa Department of Social Welfare and Development kon DSWD-Caraga ang mga komentarista sa Bombo Radyo Butuan human ang padayganay og mga punto kagahapon sa gawas nga bahin sa ilang buhatan.
Partikular nga gireklamo ni Marco Davey Dolotina Reyes, 36-anyos, minyo ug residente sa Bliss, Brgy. Libertad ning siyudad sa Butuan ngadto sa Butuan City Police Station 1 sila Bombo Benjie Barazan ug Bombo Rey Brangan – ang chief of reporters ning sibyahan.
Base sa reklamo ni Dolotina, gilapas matud pa ni Bombo Benbarz ang usa sa mga protocols sa community quarantine nga mao ang social distancing dihang midalikyat kini sa premises sa ilang buhatan ug gi-nterview ang mga tawong gustong manguha og impormasyon kalabot sa programa sa gobyerno partikular ang kalabutan sa Social Amelioration alang sa mga kabus nga pamilya subay sa nagtunhay nga COVID-19.
Samtang gireklamo usab ni Reyes si Bombo Rey tungod sa pagtawag matud pa kaniya og ‘inutil’ ug dili angayan sa posisyon diha sa ere.
Nasayrang gidalikyatan na kagahapon ni Bombo Benjie ang maong buhatan tungod kay dili mutubag si Reyes sa mga gi-initiate nga tawag ning sibyahan aron unta ipasabot sa katawhan ang maong programa apil na ang social pension nga gustong kuhaon sa mga senior citizens.
Inay nga magkasinabot, misangpot sa tinubagay ang maong insidente kagahapon gumikan sa wala pagsanong duha ka wala magpa-ilang personahe nga tubagon ang mga pangutanang naghatag og kialibog sa katawhan kinsa gustong mahatagan og tubag sa maong buhatan.
