BUTUAN CITY – Sunod-sunod na nga kaso sa hikog ang natala dinhe sa rehiyon sa Caraga kagahapong adlawa. Kini human gikumpirma usab ni Alyas Nerio ang pagtubok sa biktimang si Ramon Cortez, gibana-banang anaa sa 30-anyos, dunay kapuyo og dunay tulo ka mga anak ug lumad nga taga Magallanes, Agusan Del Norte apan kasamtangang nagpuyo sa Purok 5, Barangay Cecilia, San Luiz, Agusan Del Sur.
Saysay pa ni Alyas Nerio, mga alas 9:00 kagabii sa dihang nakit-an nalang sa iyang mga bayaw nga nagbitay diha sa sala sa ilang balay ang biktima nga wala nay kinabuhi.
Gigamit niini sa pagtubok ang pisi. Sa nakuha niining impormasyon, adiser pa ang panghitabo, nakalalis sa biktima diha sa cellphone ang iyang kapuyo nga usa ka bulan palang nga miadtu sa Manila.
Posible matud pa kini ang nagtuklod sa biktima nga mubuhat sa ingon ilabina kay niadtong higayona naka-inom kini sa ilimnong makahubog. Sa pagkutlo ning balita, anaa pa sa panimalay ang patay’ng lawas niini samtang gipaabot ang amahan sa biktima.
Nasayran nga kagahapon usab sa buntag sa dihang nagkutlo sa kaugalingong kinabuhi ang biktimang si Salazar Añasco 21-anyos nga taga Chua St. Brgy. Daguhoy ning siyudad sa Butuan ug nagtungha sa usa ka kolehiyong tunghaan.
Nahitabo ang insedente sulod sa pansayan sa ilang panimalay diin gamit usab niini ang pisi.
Subay sa inisyal nga imbestigasyon sa kapulisan diha sa pagsubay sa cell phone sa biktima nakita nga duna kini panagla-lalis sa iyang uyab adiser ang pagkutlo sa kaugalingong kinabuhi.
