BUTUAN CITY – Natayming gyod atol sa kalag-kalag ang pagbangutan sa pamilya Toquera sa Brgy. Sta. Fe, lungsod sa Esperanza, lalawigan sa Agusan del Sur human nalumos kagahapon atol sa Adlaw sa mga Santos kon All Saint’s Day ang duha ka manag-agaw nga bata samtang nangaligo og dagat sa lungsod sa Lianga, Surigao del Sur.
Gi-ila ni Police Staff Sergeant (PSS) Marlo Layno sa Lianga Municipal Police Station ang mga biktimang sila Yeshin Toquera ug Cherry Mae Toquera, parehong 8-anyos.
Pasado alas-2:30 kagahapon sa hapon dihang unang napalgang naglutaw sa dagat nga sakop sa Lawis Beach Resort sa Sitio Lawis, Brgy. Banahaw sakop sa maong lungsod si Yeshin nga patay na ug sunod nga napalgan si Cherry May paglabay sa usa ka oras.
Sa eksklusibong interview sa Bombo Radyo Butuan, gipadayag sa maong police officer nga namatikdan na lang sa magkabanay nga wala pa makapani-udto ang duha rason nga gipangita nila kini.
Posible matud pang nalingaw na ang kabanay sa mga biktima rason nga ulahi na lang nga namatikdan nga wala sila sa ilang grupo.
