BUTUAN CITY – Pabiling komitido ang mga barko sa Philippine Coast Guard kon PCG nga ipadayon ang ilang mission paghatud sa mga gikinahanglang supplies ngadto sa mga personahe nga nadestino sa Patag ug Lawak Islands bisan pa man sa pagbangga sa duha ka barko sa China Coast Guard ngadto sa duha ka barko usab sa Philippine Coast Guard kaganinang kaadlawon.
Ang nalambigit sa insidente mao ang China Coast Guard vessel 3104 ug 21551 ingon man ang mga barko sa Philippine Coast Guard nga BRP Bagacay (MRRV-4410) ug BRP Cape Engaño (MRRV-4411).
Sa Facebook post ni PCG for the West Philippine Sea spokesperson Jay Tarriela, gibutyag nini nga natigayon ang insidente tungod sa delikado ug ilegal nga maneuvers sa mga barko sa China ngadto sa mga barko sa Philippine Coast Guard dihang padulong sila sa Patag ug sa Lawak Islands in the West Philippine Sea.
Miresulta kini sa structural damage sa duha ka mga barko sa Pilipinas ilabina sa starboard beam sa barko nga nagmugna og bangag sa deck nga duna’y gidak-ong 5-pulgadas sa diametro.
Pagka-alas 3:40 sa kaadlawon, ang BRP Bagacay nga anaa sa habagatang sidlakan sa Escoda Shoal— kaduha gibanggaan sa CCG vessel 21551 diha sa port ug starboard niini hinungdan sa gamay nga structural damage.
Bisan pa man niini, hugot nga gibarugan sa PCG nga siguruhon ang kaluwasan ug siguridad sa maritime domain samtang gitutukan ang bisan unsa mang hulga sa atong national interests.
