BUTUAN CITY – Patay gilayon ang duha ka mga barangay tanod human gibanhigan sa mga armadong kalalakin-an sa usa ka hilit nga lugar sa Barangay Tumahubong, lungsod sa Sumisip, Basilan niadtong Biyernes sa hapon.
Sigon ni PBGen. Romeo Jaime Macapaz, director sa Police Regional Office-Bangsamoro Autonomous Region, angkas sa motorsiklo sila Hasid Dohong Bidalul ug Ridzman Saratul Asdaman dihang gi-atangan ug gipamusil sa mga armadong nakapwesto kilid sa kalsada sa maong barangay.
Nasayran nga parehong aktibong miyembro sa Barangay Peacekeeping Action Team ang duha ubos sa pagdumala sa local government unit sa Sumisip.
Padayong nagtinabangay ang mga barangay officials sa Tumahubong ug mga imbestigador sa Sumisip Municipal Police Station aron ma-ilhan ang mga nag-ambush ug mapasakaan og tukang kaso.
