BUTUAN CITY – Anaa na sa kostudiya sa kapulisan sa Bislig City, lalawigan sa Surigao del Sur ang pulis nga mipusil-patay sa duha ka babaye sulod sa usa ka imnanan sa Purok 3, Bongaitan District, sa Barangay Mangagoy ning mi-aging alas- 11:20 sa gabii human kini misibat sa crime scene padulong sa gym sa Bry. Mangagoy diin siya nadakpan.
Gi-ila ni Bislig City acting chief of police Magdalino Pimentel Jr., ang responsableng si Police Master Sergeant (PMSg) Kinneth Viola Cacho, 37-anyos, minyo, residente sa Barangay Poblacion, Cateel Davao Oriental ug nadestino sa Davao Oriental-Provincial Drug Enforcement Unit. Samtang ang mga biktima, gi-ilang Janeth Catarman Besa, 25-anyos, dalaga, residente sa Brgy. San Vicente, ug Karyl Mae Abanggan, 21-anyos, dalaga ug residente sa Brgy. Tumanan, Bislig City.
Migawas sa inisyal nga imbestigasyon nga ang mga biktima ka-uban ang suspek misulod sa maong imnanan pasado alas-dies sa gabie ug nag-inum dihang kalit lang silang nagkalalis nga misangpot sa pagpusil sa maong pulis ngadto sa usa sa mga biktima ug gi-apil na ang usa pa nila ka ka-uban nga misulay pagbadlong kanila hinungdan sa ilang kamatayon. Narekober sa crime scene ang walo ka mga basiyo sa bala sa 9mm pistol ug sa pagrekisa sa bag sa suspek laing usa ka magazine nga dunay sulod 14 ka mga buhing bala ang narekober.
