BUTUAN CITY – Patay ang duha ka Grade 8 nga mga tinun-an human nga nadasmagan ang ilang gisakyang single-motor sa usa ka multicab.
Sa pakighinabi ning sibyahan, gibutyag ni SPO1 Erwin Betarmos, Operation PNCO sa Santiago MPS, nga naila ang mga biktima nga sila Eduardo Batolabac, 14, ug backrider nga si Welgie Malasa Vega, 15, ug parehong taga- P1 Brgy. San isidro sakop sa maong lungsod.
Sakay matud pa ang mga niini sa usa ka Skygo 125 nga nagtangag sa temp. plate # 1501-0110869 nga nagdagan paingon sa may syudad sa Cabadbaran nga parehong wala nakahelmet . Samtang ang gikabangga niini mao ang usa ka Multicab nga nagtangag sa plaka numero ADN 9428 nga gimaneho ni Alfredo Facundo Torino, 52, menyo, ug Brgy Kagawad sa San Pablo, Jabonga, Agusan del NOrte kangsa nagdagan gikan sa syudad sa Cabadbaran paingon sa syudad sa Surigao.
Gisundan usab kini sa usa ka Honda XRM 125 nga nagtangag sa plaka numero KA 121860 nga gimaneho usab ni Jayphee Rubas Magpatoc, 29, taga -Malaybalay, Bukidnon kauban ang backrider nga si Gerline Magpatoc, 26, menyo.
Base sa mga nakasaksi sa aksidente, miliko matud pa pa-wala nga direksyon ang unang single-motor aron nga musubay sa highway apan aksidente kining misugat sa pasugat nga multicab resulta sa maong aksidente.
Sa karon, gikustodiya na sa mga kapulisan sa Santiago MPS ang driver sa multicab lakip na ang driver sa ikaduhang single-motor samtang nagpadayon pa ang imbestigasyon sa mga kapulisan.
Natigayon ang aksidente bandang alas – 3:40 ang takna sa hapon sa may National Highway sa Purok 3 Brgy. San Isidro, Santiago, Agusan del Norte.
