BUTUAN CITY – Hilabihan ang pagpasalamat sa Top 4 sa 2018 nursing licensure examination ngadto sa Ginoo tungod sa naabot nga kalampusan.
Sumala pa ni Pjeeco Plaza Bagasbas, residente sa Bislig City, Surigao Del Sur og nagtungha sa West Visayas State University sa La Paz, Iloilo City, gipangamuyo na sa tibook niyang pamilya nga mag-Top siya sa moang eksaminasyon.
Apan daghan matud pang mga pangutana nga dili siya segurado sa tubag bisan ug siya nag-review pa.
Ang iyang gibuhat lang matud pa mao ang pag-relax sa kaugalingon dungan sa pagsalig sa Kahitas-an.
Kini ang rason sa hilabihan niyang kalipay sa dihang nasayran nga nabutang siya sa Top 4 sa average nga 86.60.
Alayon niini, mitambag kini sa tanang estudyante nga magtoon og maminaw sa mga magtutudlo tungod kay dako kini ug tabang sa pagtake unya sa board. Apan mitambag usab kini nga kinahanglang hatagan ug relax usab ang kaugalingon.
Gi-credit ni Gay Malhi Catedral, 20-anyos og residente sa Brgy. 7, lungsod sa Nasipit, Agusan del Norte, ang iyang pag-top 7 sa 2018 nursing licensure examination ngadto sa iyang tunghaan sa West Visayas State University sa La Paz, Iloilo.
Sa eksklusibong pakighinabi ning sibyahan, gibutyag ni Catedral nga kini tungod kay ang ilang tunghaan maoy nangunay pagpahigayon sa ilang review human sila migradwar nga 171 ka mga estudyante niadtong Marso ning tuiga.
Gawas nga inspired sila sa ilang pag-review, close usab sila kaayo sa ilang coordinatora tungod kay buksan nila ang review pinaagi sa devotional prayer kansa tapuson usab sa susamang pag-ampo.
Ang iya usab nga pagsentro sa iyang mga gihimo ngadto sa Ginoo ang usa sa iyang gi-ilang
hinungdan sa nakab-ot niya karong kalampusan.
Iyang gidugang nga aksidente lang ang iyang pagpili sa kursong nursing tungod kay Bachelor of Science on Biology unta ang iyang kursong kuhaon.
Gipapili matud pa sila sa kursong ilang eskwelahan kondiin ang iyang natsikan mao ang nursing og dihang mipasar siya sa entrance exam, iya na lang kining gipadayon hangtud nga giganahan na siya niini ilabina sa mga clinical experiences nila sa tunghaan.
