BUTUAN CITY – Napatay sa kapulisan sa Bunawan, Agusan del Sur sa natigayong shootout, ang suspek sa brutal nga paglugos-patay sa duha ka mga batang babayeng nag-edad pa lang og 7 og 9-anyos.
Gi-ila ni P/Sr. Insp. Ma. Gemma Corvita – hepe sa Bunawan Municipal Police Station, ang suspek nga si Wilmar Peñaloga, 22-anyos og residente sa Purok 6-B, Brgy. San Teodoro sakop sa maong lungsod.
Gibutyag sa sa opisyal nga niadto pang Biernes sa hapon nawala ang mga biktima apan pagka-Sabado na gitaho sa ilang buhatan hinungdan nga gipangita gilayon nila kini.
Kagahapon pa sa hapon napalgan ang patay’ng lawas sa mga biktima nga gilubong na og duna pa’y mga samad-linubaan sa nagkada-iyang parte sa lawas og gigulgulan pa ang li-og ingon man laceration sa ilang kinatawo, timaan nga sekswal silang gihilabtan.
Nasubay lang nga ang suspek maoy mihimo sa kremin tungod sa pipila ka mga tawong nakaksi kaniyang anaa sa maong dapit atol sa ilang pag-agi og nagpakita og kadudahang lihok.
Dihang gilusad na ang operasyon, mi-aksyon matud pa pagsibat ang suspek dayong pabuto sa iyang dalang armas hinungdan sa natigayong pinusilay. (Beth Ruiz)
