BUTUAN CITY – Gikustudiya na sa kapulisan ning siyudad sa Butuan ang drayber sa usa ka dumptruck nga nakabundol sa usa ka unit sa bus nga miresulta sa pagkatagak sa duha ka mga sakyanan sa basakan sa may Purok-16, Barangay Mahay ning dakbayan pasado alas-6:15 kagabii.
Sa pakighinabi ning sibyahan kang SPO1 Andy Busa, sa Butuan City Police Station-1, gikan sa Surigao City ang nalambigit nga bus nga dunay body number 3110 ug plaka numero KVU 821 ug gimanehuan ni Augusto Dequineo, 32-anyos nga taga Sison, Surigao Del Norte.
Sa pag-abot sa kahitabuan, kalit matud pang mihunong ang bus tungod sa mokanaog nga pasahero sa dihang nabundol kini sa nagsunod nga dumptruck nga nagtangag sa plaka numero AAI 3295 nga puno sa balas, ug gipanagiyahan sa zcharles construction kansa gimanehu ni Ritchie Cervo, 34-anyos, menyu ug residente sa Barangay Mat-i, Las Nieves, Agusan Del Norte.
Tungod sa kakusog sa impak, nabaliktad ang bus nga nahagbong sa basakan samtang ang wala na usab nakontrola sa drayber ang dumptruck ug nahagbong usab kini sa atbang nga basakan.
Daghang mga pasahero ang nakahiagum ug injury nga daling gidala sa nagkadaiyang balay tambalanan ning siyudad.
Sigon pa ni SPO1 Busa, padayon nilang gikuhaan ug dokumentasyon ang mga pasahero.
Midepensa usab ang drayber sa dumptruck nga si Cervo kansa anaa sa kustudiya karun sa kapulisan, sa pag-ingong hinay lang ang iyang dagan apan tungod sa kalit nga paghunong sa bus nga wala man lang migamit sa signal light.
Sa dihang pahagbong na sa basakan ang iyang sakyanan, naneguro nalang siya sa pag-ambak.
Nasayrang lakip sa mga nitabang sa pagdala sa mga na-angol nga mga pasahero, si kanhe Butuan City Mayor Ferdinand Amante Jr, human na-agian ang maong aksidente.’ (Rolan Janea)
