BUTUAN CITY – 19 ka mga local government units kon LGUs ning rehiyon sa Caraga ang pasidunggan sa Department of Interior and Local Government kon DILG human mipasar sa Seal of Good Local Governance (SGLG) Awards alang sa tuig 2019.
Pinakadaghan ang mga LGUs sa lalawigan sa Surigao del Norte nga gilangkuban sa Surigao City, ingon man mga lungsod sa Burgos; Gigaquit; Mainit; Malimono; Sison; Sta. Monica ug Tubod samtang duha sa Agusan del Norte nga mao ang mga lungsod sa Carmen ug Las Nieves.
Sa Agusan del Sur, kini gilangkuban sa mga lungsod sa Esperanza, Prosperidad ug Trento, samtang ang lungsod sa Dinagat usab alang sa Dinagat Islands Province ug sa Surigao del Sur, gilangkuban kini sa mga lungsod sa Cagwait, Carrascal, Cortes, Hinatuan, ug Tandag City.
Himuon karong Pebrero 5 ang awarding ceremony pinaagi sa social media platforms nga duna’y temang “ Seal of Good Local Governance (SGLG) Awards CY 2019: Pagpupugay sa Katapatan at Kahusayan ng Pamahalaang Lokal”.
Una nang gibutyag ni Department of Interior and Local Government kon DILG-Caraga Assistant regional Director Donald Seronay sa eksklusibong pakighinabi sa Bombo Radyo Butuan nga ang mga LGU nga mupasar, duna’y dakong kantidad nga madawat isip performance challenge fund depende kung siyudad, lungsod o kaha lalawigan ang mapilian.
Sigon ni Seronay, ang Seal of Good Local Governance ( SGLG ) Awards mao ang ihatag nga pasidungog sa Department of the Interior and Local Government alang sa mga local government units nga nagpakita og maayong kadumalahan sa ilang tagsa-tgsa ka lugar nga ginsakupan.
Apil sa madawat sa 19 ka mga LGUs ning rehiyon ang mahatagan og SGLG ang 3.5-milyunes pesos nga performance challenge fund alang sa mga siyudad, 2.3-milyunes pesos usab alang sa mga lungsod ug 4.5 milyunes pesos alang sa mga probinsya.
