BUTUAN CITY- Nasikop sa kapulisan sa Surigao City Police Office ang 19 ka indibidwal niadtong Pebrero 12, 2026 sa Barangay Danao, Surigao City tungod sa kalapasan sa Section 8 sa Republic Act No. 7076 o People’s Small-Scale Mining Act of 1991.
Sumala ni PLtCol. Mariano Lukban, Chief of Police sa Surigao City Police Office, nga gipasakaan og criminal complaints niadtong Pebrero 13 ang mga suspek, ug gipamatud-an sa resolusyon nga gipagawas niadtong Pebrero 14, nga adunay probable cause ang kaso.
Sigon niini, nga gipagawas na usab ni City Prosecutor Adolfo Aure ang piyansa nga P10,000 matag usa, ug gilauman nga sa karung adlawa, Lunes Pebrero 16, 2026 magsumite ang maong mga idibidwal og bayad sa Office of the Clerk of Court. Gipahibalo usab ni PLtCol. Lukban, nga ang operasyon naglakip sa koordinasyon sa lokal nga barangay ug sa mga ahensya sa minahan aron masiguro ang kaluwasan sa mga residente.
Gipanghimakak usab sa kapulisan ang tanang alegasyon nga adunay pagpabor sa mga nadakpan, ug gipasalig nga patas ug lig-on ang proseso sa hustisya.
Dugang pa, giklaro usab ni PLtCol. Mariano Lukban, nga ang mga suspek nga nadakpan dili taga Surigao City kondili mga residente sa silingang lungsod sa Anao-aon, San Francisco, Surigao del Norte, samtang ang laing grupo gikan sa Alegria, Surigao del Norte.
Gibutyag usab niini, nga puros mga lumad nga Surigaonon ang mga suspek ug walay sagol nga mga intsik kansa dugay nang adunay kasinatian sa pagmimina ug mao gyud kini ang ilang panginabuhi.
Gi-angkon pa niini, nga gipakusgan na sa kapulisan ang kampanya batok sa illegal mining tungod sa hulga nga gidala niini sa kalikupan ug sa kinabuhi sa katawhan.
Gipahinumdom pa ni Lukban nga nahitabo na kaniadto ang trahedya sa banlasan sa Surigao diin duha ang namatay human matabunan sa yuta samtang nag small-scale mining.
Gidasig usab niini ang publiko nga mosunod sa balaod ug magpahimangno sa mga kalihokan nga makadaot sa kalikupan ug makapahamtang og peligro sa komunidad.
