BUTUAN CITY – Dili mu-ubos sa 18 ka mga tawo ang patay samtang 30 ang angol sa sunod-sunod nga pagbusikad sa northeastern Borno state sa Nigeria.
Ang usa ka gitu-uhang pagpamomba sa usa ka wedding ceremony, mikalas og unom ka mga tawo. igon sa Emergency Management Agency sa Norno, gi-atake sa mga suspected suicide bombers ang usa ka kasal, lubong ug usa ka ospital sa lungsod sa Gwoza.
Ang Borno state sentro sa 15-ka tuig nang insurhensiya sa mga militanteng Islamistang Boko Haram nga maoy nakapadislokar sa 2-milyunes ka mga tawo ug mikalas sa kapin 40,000.
Naila sila sa ilang kabangis sa tibuok kalibutan niadtong tuig 2014 dihang ilang gidagit ang 240 ka mga estudyanteng babaye gikan sa lungsod sa Chibok.
Sigon sa mga otoridad, apil sa mga namatay ang mga bata, mga hamtong ug mga buntis.
Gipatuman na ang curfew sa maong lugar ug hangtod sa pagkutlo niini nga balita, wala pa’y mi-angkong responsable sa maong mga pagpangatake.
