BUTUAN CITY – Tingkagol na sa prisuhan ang 18-anyos nga dalaga human gisikop sa kapulisan tungod sa pag-post og pekeng impormasyon nga matud pa, duna na usa’y laing coronavirus disease 2019 kon COVID-19 positive sa Bayugan City, Agusan del Sur.
Gidakop si Arjuna Bauro diha sa iyang panimalay sa Brgy. Taglatawan, Bayugan City pasado alas 10:00 sa buntag.
Nasayrang sa iyang social media post, gi-awhag usab niini ang publiko nga dili na mogawas sa ilang tagsa-tagsa ka panimalay.
Gi-angkon sa suspect nga siya ang tag-iya sa nasangpit nga social media account apan gihimakak nga nag-post siya og sayop nga impormasyon nga mikatag online.
Ang suspetsadong si Bauro gireklamo og kalapasan sa R.A 11469 kon Bayanihan to Heal as One Act sa City Prosecutors Office sa Bayugan City.
Nasayrang padayon ang Regional Anti-cyber Crime Unit 13 sa ilang cyber space patrolling aron ma-monitor ang mga social media users nga mag-post o mag-share og mga pekeng balita dayong panghinaut nga unta magsilbi kining pagtulun-an sa tanang netizens nga mahimong responsable ilabina ning panahon sa health crisis.
