BUTUAN CITY – Muabot sa 1,700 ka mga senior citizens ang nabakunahan na dinhi sa dakbayan sa Butuan sa tulo ka vaccination posts sa nakalabay nga nga upat ka adlaw.
Sa pakighinabi sa Bombo Radyo Butuan, gibutyag ni Michiko De Jesus ang tigpamaba sa Butuan City -LGU, nga maayo ang turnout sa mga senior citizens nga nagpabakuna kagahapong adlawa tungod kay gidagsa ang mga vaccinations post, labi na ang gimontar sa FSUU Morelos, Robinsons Place Butuan ug SM City Butuan.
Kamatuoran niini sayo pa lang, atua na sa mga vaccination post ang mga andam mudawat sa bakuna ug tungod usab sa overwhelming nga ihap, gitambagan ang ubang senior nga sa sunod na lamang nga mga adlaw magpatupok tungod kay limitado pa ang mga bakuna.
Gikalipay usab sa tigpamaba ang mga resulta sa nagpabakunang senior citizens tungod kay indikasyon matod pa kini nga midaghan na ang nadasig ug interesado nga mudawat na usab sa bakuna aron adunay proteksyon batok sa COVID-19.
Karong adlawa, wala nay himuong pagpamakuna sa SM City tungod kay nahurot na nila og tupok ang alokasyon samtang ang Morelos bakunahan na lamang ang 30 ka differed nga mga senior citizens ug ang ang vaccination post sa Robinsons Place Butuan hutdon na lamang ang nabiling alokasyon alang sa mga senior sa Barangay Mahogany.
Giklaro usab ni De Jesus nga ang pre-register online aron maapil sa COVID-19 vaccination program abre pa lamang alang sa Barangay Lapu-Lapu kansa og maayo matod pa ang turnout gilayon kining abrihan sa ubang mga barangay.
Gidugang ni Michiko nga sukad nagsugod ang pagpamakuna sa mga Priority Group A2 sa dakbayan adtong Lunes walay natalang mga adverse effect gawas lamang sa mga normal nga mabati nga pagpanghawoy sa bukton diin gitupok ang bakuna ug uban pa.
Madumdumang nabakunahan na usab si Vice Mayor Jose S. Aquino II, isip parte sa Priority Group A2 nga gilangkuban sa mga senior citizens.
