BUTUAN CITY – 16 ka mga tawo ang patay samtang 18 pa ang angol sa makalilisang nga aksidente sa de-pasaheruang bus sa Indonesia, human kini mibangga sa konkretong babag sa nag-unang isla sa Java.
Base sa report sa mga awtoridad, paingon unta sa siyudad sa Yogyakarta ang bus gikan sa kapital Jakarta dihang nahitabo ang aksidente sa kurbadang exit sa Krapyak toll road.
Sumala sa inisyal nga imbestigasyon, misobra sa liko ang bus tungod kay paspas kaayo ang dagan niini, hinungdan nga nawadan og kontrol ang drayber ug mibangga og kusog sa konkretong barrier.
Tungod sa kakusog sa bangga, pipila ka pasahero ang milagpot gawas sa sakyanan ug ang uban naipit sulod sa nadaot nga bus. Unom ka pasahero ang gideklarang patay dayon sa lugar, samtang napulo pa ang gidala sa lain-laing mga ospital apan namatay usab tungod sa grabeng mga samad samtang padayon pang gitambalan ang laing 18 ka nasamdan, ug ang uban kanila anaa sa kritikal nga kahimtangan.
Sumala ni Budiono, hepe sa search and rescue team, milabay pa ang pipila ka minuto adiser nakaabot sa lugar ang mga pulis ug rescue personnel.
