BUTUAN CITY – Mu-abot sa 16 ka mga lungsod og siyudad sa Caraga Region ang inisyal nga mohimo og panagtapok isip pagtimbaya sa adlaw nga natawhan ni kanhi Pangulong Rodrigo Duterte karung Marso 28.
Sigon ni Engr. Dioric Gavino, ang secretary general sa Sara All Movement, lakip sa dunay panagtapok didto sa Nasipit, Agusan del Norte; sa Bayugan City sa Agusan del Sur; Sa Tandag City sa Surigao del Sur ug sa Siargao Islands sa Surigao del Norte.
Dinhe sa Butuan City, dunay consolidation sa aktibidad sa daghang grupo aron motimbaya sa kanhi pangulo. Magpahigayon usab og motorkada, hamubo nga programa, og candle-lighting isip pagpa-abot og pagtimbaya sa adlaw nga natawhan sa kanhi pangulo. Padayon pa ang pagplano sa maong kalihukan aron dili makamugna og grabeng trapiko.
Samtang dunay zoom meeting usab nga himoon ang DDS-Sara All Movement ugmang adlawa Marso 27 nga sugdan sa alas-10:00 sa gabii hangtud na sa pagsugat sa adlaw nga natawhan ni kanhi Pangulong Duterte.
Lauman nga daghan ang mulambigit niini lakip na ang mga overseas Filipino workers samtang kumpirmado na usab ang pag-apil nila Mayor Baste Duterte ug Kitty Duterte.
