BUTUAN CITY – Desi-sais ka mga kandidato pagka-kapitan sa lungsod sa Buenavista, Agusan del Norte ang gi-disqualify sa Commission on Elections kon COMELEC 2nd Division human gikansela ang ilang certificate of candidacy kon COC alang sa nagkaduol nga Barangay ug Sangguniang Kabataan elections karong Oktubre 30.
Sa eksklusibong pakighinabi sa Bombo Radyo Butuan, gipadayag ni COMELEC-Caraga regional director Francisco Pobe nga ilang nadawat kaganina ang hard copy sa resolusyon sa proceedings batuk sa mga kandidato pagka-kapitan sa mga barangay Agong-ong, Abilan, Guinabsan, Alubihid, Macalang, Matabao, Malapong, Malpoc, Lower Olave, Talo-ao, Poblacion 1, 3, 4, 7, 9, ug 10. Gi-file matud pa ang disqualification cases human og file sa mga kandidato sa ilang certificate of candidacy kon COC. Ang ilang pag-serve sa maong kanselasyon, base na usab sa kamanduan ni Commission on Elections kon COMELEC chairman George Erwin Garcia nga i-serve kini adiser ang eleksyon aron malikayan ang nahitabo sa nangagi nga bisan og duna na’y disqualification proceedings, naproklama pa gihapon ang mga nangdaug.
Gipasabot ni Atty. Pobe nga nakita sa COMELEC 2nd Division nga peke ang giduso nga certificate of candidacy kon COC sa nasangpit nga mga kandidato tungod sa pagpanotaryo nila sa dili otorisadong tawo o dili abogado kansa gi-angkon mismo sa mga respondents. Gani sa mismong petisyon sa mga petitioners, nag-attach sila og affidavit sa tinuod nga abogadong gigamit sa mga respondents nga maoy nagpamatuod nga wala sa iyang notarial book ang notarial registry number sa nasangpit nga mga kandidato.
Subay niini, iya nang gimanduan ang iyang provincial election supervisor aron hatagan og kopya niini ang mga kandidato ingon man ang mga election registration board chairmen.
