BUTUAN CITY – Padayon pang gipangita sa kapulisan sa Tuguegarao City ang usa ka amahan nga mi-unay pagluba-patay sa iyang 16- anyos nga dalagitang anak sulod mismo sa ilang balay sa Barangay Carig Norte, Tuguegarao City, Cagayan ning mi-aging gabii.
Kini aron usab masuta ang hinungdan sa pagpatay ni Jude de Asis Ballad sa iyang Grade 11 student nga anak.
Sigon ni PCapt. Rosemarie Taguiam, tigpamaba sa Tuguegarao City Component Police Station, pasado alas-7:00 ning mi-aging gabii, gipangita sa suspetsado ang iyang anak dihang naka-uli na gikan sa iyang trabaho ug dihang nadungog sa dalagita nga gipangita siya sa iyang amahan, dali kining mipa-uli gikan sa balay sa iyang lolo nga nasundan sa pagsyagit sa dalagita kansa nadunggan sa mga silingan rason nga ila kining gidalikyatan.
Dako na lang ang iyang kakurat dihang ilang na-abtan nga nagkadugo na ang biktima human giluba-luba sa iyang amahan nga daling misibat human sa insidente.
Gidala pa kini sa ospital apan gideklarang dead-on-arrival.
Nasayrang nagtrabaho sa laing nasud ang inahan sa biktima.
