BUTUAN CITY – Mi-abot sa 69 ka mga panimalay sa Purok Sibuyas, Brgy. Golden Ribbon ning siyudad sa Butuan nga gipuy-an sa gibana-banang 150 ka mga pamilya, ang malampusong na-demolish sugod kaganinang buntag.
Kini human gi-serve sa demolition team ang kamanduan gikan sa Branch 33 sa Regional Trial Court, 10th Judicial Region, ang gi-isyung final notice to vacate and demolition. Base sa writ of demolition nga gipagawas niadtong Mayo 17, 2023, gipahibalo sa korte nga nasunod ang tanang rekisitos nga nakalatid sa Republic Act 7279 alang sa demolisyon.
Nasayrang ang Presidential Commission on the Urban, nag-isyu gilayon sa gikinahanglang sertipikasyon alang sa paghatag og police assistance, alang sa pagpatuman na sa demolisyon nga unang gitakda kagahapong adlawa, Abril uno apan gisibog ning adlawa tungod sa mga last minute nga negosasyon.
Giklaro ni Brgy. Kagawad Marites Gultiano nga taas nga panahon ang ilang gihatag ngadto sa mga apektadong residente human sila nakadawat og court order aron biyaan na sa mga hingtungdang pamilya ang nasangpit nga lugar.
Gani pila ka higayon usab silang nagpatawag og meeting aron masabutan og sakto ang angayang buhaton kondiin gihanyagan na sila og relocation site sa Brgy. Pagatapatan apan wala kini gi-avail sa mga hingtungdan hangtud nga napatuman gayod ang demolition order.
Aminado usab si Kagawad Gultiano nga sa 69 ka mga households, 15 lang ang nakapasar sa gihimong relocation screening base na usab sa mga rekisitos, aron didto na mu-relocate sa Brgy. Sto. Niño ning siyudad sa Butuan.
Sila ra usab ang nahatagan og 23-mil pisos sa claimants sa usa ka ektaryang luna. Hinuon mipasalig ang kagawad nga wala’y angayang kabalak-an tungod kay gawas sa barangay council, mipasalig usab ang city government nga matunulan og ayuda ang uban pa.
