BUTUAN CITY – Muabot na sa 15 ka mga miyembro sa bugos nga tribal group ang misurender sa otoridad kagahapong adlawa, Enero 29, 2025.
Sigon ni Police Colonel Warren Dablo, provincial director sa Surigao Del Norte Police Provincial Office, 9 sa maong ihap ang misurender sa Surigao City Police Station samtang unom usab sa Criminal Investigation and Detection Group kon CIDG-Surigao Del Norte.
Dugang pa sa opisyal nga ang mga nagsurender parehong taga Monkayo, Davao De Oro nga gi-recruit pinaagi sa text messages nga dunay activity silang himoon sa Surigao City bugti sa kwartang madawat nga anaa sa 15-mil ngadto sa 50-mil pesos.
Apan misurender ang mga niini human na-reyalisar nga sayup matud pa ang gibuhat sa bugos nga tribal group nga Federal Tribal Government of the Philippines nga gipangunahan nila Jorgeto Corpuz Santisas alyas Datu Adlaw og Bae Lourdes Latraca Infante.
Gikumpirma usab ni Police Colonel Dablo nga ang mga nagsurender lakip sa respondent sa gipasakang kaso rasong makig-estory sila sa city persecutor alang sa sunod nga buhaton.
Subay niini, nanawagan ang opisyal sa uban pang miyembro sa peke nga tribal group nga musurender na aron sila matabangan nga maplastar.
