BUTUAN CITY – Kinse ka mga air-conditioned bus units ang apil sa Service Contracting Program karon tali sa Bachelor Express Incorporated kon BEI ug sa Land Transportation, Franchising and Regulatory Board kon LTFRB kansa gilusad kagahapong adlawa aron mubiyahe sa rutang Butuan City ug Las Nieves, Agusan del Norte ug vice versa.
Mismong si LTFRB chairman Atty. Martin Delgra III ang nanguna sa paglusad sa maong programa aron masigurong mas mapasayon na ang pagbiyahe sa katawhan sa mga dapit nga maagi-an niini.
Kini ilabina nga dili na special permit ang gihatag sa ahensya ngadto sa operator kondili prangkisa na. Sa iyang pagpamulong, iyang gipasabot nga ubos sa nasangpit nga programa, mutabang ang kagamhanan paghatag og pinansyal nga ayuda ngadto bus operator aron matapalan ang mawala nilang kita kada-adlaw kung wala kaayo’y musakay nga mga pasahero.
Alayon niini, nanawagan siya sa tanang mga residente sa mga lugar nga maagi-an sa nasangpit nga ruta nga mutabang sa maong programa pinaagi sa pagsakay sa nasangpit nga mga bus atol sa ilang pagbiyahe.
