BUTUAN CITY – Dugta nang napalgan kagahapon, Agosto 14, taliwa sa katubuhan sa Hacienda San Roque, sa Barangay Cubay, La Carlota City ang usa ka Grade 10 student sa Bacolod City nga na-missing sukad pa niadtong Hulyo 29.
Ang biktimang 15 anyos nga gitago lang sa pangalang Joy, estudyante sa Sum-ag National High School, gi-ila mismo sa iyang inahan kinsa mibyahe pa og 45-kilometros gikan sa Bacolod City aron lang susihon ang patay’ng lawas nga anaa na sa advanced state of decomposition.
Gitu-uhang gilugos ang biktima ug gipatay ug didto na gilabay sa maong dapit.
Nasayrang nag-eskwela pa ang biktima niadtong Hulyo 29 ang katapusang adlaw nga nakita siya sa ilang eskwelahan.
Migawas sa inisyal nga imbestigasyon sa kapulisan sa Bacolod City ug sa La Carlota City gikan sa iyaan sa biktima nga duna kini gikatagbo nga lalaking hamtung kondiin gipa-angkas siya sa motorsiklo.
Lakip usab sa gisusi ang posibleng kalambigitan sa ama-ama sa biktima kansa sigon sa iyang inahan, upat na ka adlaw nga wala mupa-uli sa ilang balay.
