BUTUAN CITY – Patay ang usa ka 15-anyos nga batang lalaki human kini nalumos samtang nag-snorkeling sa Magpupungko Beach, lungsod sa Pilar, Siargao Island, Surigao del Norte, kagahapong adlawa, Hunyo 5.
Sumala sa inisyal nga imbestigasyon, nagbakasyon lamang sa Siargao Island ang pamilya niini gikan sa Estados Unidos, apan lumad kini nga taga-Gingoog City, Misamis Oriental.
Saysay sa mga saksi, kusog ang balod sa maong dapit ug kalit lang nawala sa panan-aw sa iyang mga ginikanan ang maong batan-on kondiin mikabat pa og kapin sa 30 minutos nga pagpangita sa rescue team sa biktima. Gisulayan pa kini pag-revive sa mga mirespondeng rescuers ug gidali pag-transport sa duol nga tambalanan, apan gideklara kini nga dead on arrival.
Subay niini nagpahimangno ang mga otoridad sa mga turista nga mag-amping ilabina kon kusog ang balod sa baybayon.
