BUTUAN CITY – Gihikay na ang kasong paglapas sa sections 11 ug 12 sa RA 9165 batuk sa duha ka miyembro sa Vencilao Drug Group human nasikop kagahapon sa may Purok-3, Barangay Kauswagan, Cabadbaran City sakop sa probinsiya sa Agusan Del Norte.
Gi-ila ni Dindo Abellanosa, Regional Information officer sa Philippine Drug Enforcement Agency kon PDEA-Caraga, ang mga suspetsadong sila Reynante Cubelo, 38-anyos, minyo, walay trabaho og si Rey Philip A. Cubelo alias Loloy, 31-anyos nga parehong residente sa maong dapit.
Gihimu ang operasyon sa PDEA-Caraga bitbit ang search warrant No. 05-2018 nga gi-isyu ni Judge Ela De Villa Angeles-Lim, Presiding Judge, Municipal Trial Court sa Cabadbaran City.
Nakumpiska gikan sa posisyon sa mga suspek ang 14 ka sachetas sa gitoohang shabu nga mitimbang og 11 gramos ug duna’y market value nga muabot sa 78-mil 600 pesos uban sa nagkalain-laing drug paraphernalia.
Sumala pa niini nga daghang gisuplayan ang maong drug group nga nag-operate sa Agusan Del Norte ug Surigao Del Norte sukad kaniadtong wala pa nakalingkod sa puwesto si Pangulong Rodrigo Duterte.
Nasikop na ang ilang lider nga si Alyas Pagod kauban sa iyang misis niadtong 2016 apan nakapiyansa ug karun dili na makita pa.
Base sa monitoring, nagsumikad ang gikuhang epektus sa Marawi City apan human sa nahitabong giyera, gikan na sa Visayas area ang ilang nakuhang drogas.
Samtang gikumpirma usab ni Abellanosa nga lakip sa padayong gimonitor karun sa grupo ang pag-abot sa magnetic lifters nga dunay sulod nga mga shabu og nga nawala sa kauluhan tungod sa posibling pag-abot niini dinhe sa rehiyon. (Rolan Janea)
