BUTUAN CITY – 14 ka tawo na ang namatay tungod sa pagbaha ug pagdahili sa yuta sa isla sa Sulawesi, Indonesia. Sumala sa local rescue chief nga si Mexianus Bekabel, ang kusog nga ulan sukad pa niadtong Huwebes sa distrito sa Luwu sa probinsiya sa South Sulawesi miresulta sa pagdahili sa yuta.
Tungod sa baha nga ningabot na sa gitas-ong 3 metros, 13 na ka mga sub-district ang apektado ug natabunan na sa tubig baha ingon man lapok. Kapin na usab sa 1,000 ka panimalay ang naapektuhan, diin 42 niini ang naanod. Sa kasamtangan, padayon pa ang ginahimo nga search and rescue team sa pagpabakwit sa mga residente gamit ang rubber boat ug uban pang mga sakyanan.
Sumala sa tigpamaba sa National Disaster Management Agency nga si Abdul Muhari, anaa na sa 100 ka mga residente ang gihikling sa mga mosque o balay sa ilang mga paryente gawas sa apektadong lugar.
Kahibaloan nga ang seasonal nga pag-ulan kasagarang hinungdan sa pagdahili sa yuta ug pagbaha sa Indonesia nga gilangkoban sa kapin sa 17,000 ka isla diin minilyon ka mga tawo ang nagpuyo sa bukirong bahin o kaha sa mga kapatagan.
