BUTUAN CITY – Katorse ka mga balay sa District 6, Brgy. Sacol, Buenavista, Agusan del Norte ang malampusong na-demolish kaganina.
Sigon sa usa sa mga apektado, dugay na siyang nagpuyo sa mang lugar tungod kay didto siya gipakatawo hangtud nga nangapo na siya karon.
Duna matud pa’y tax declaration ang iyang amahan sa yutang gitarukan sa ilang panimalay nga kaniadto marine land matud pa, hinungdan nga ilang gikakurat ang pagka-apil pag-demolish sa ilang balay.
Nasuta niya nga ag-apply og land title ang nagpa-demolish sa ilang mga balay niadto pang tuig 2007 nga na-aprubahan pagka-2008 samtang ang iyang amahan nag-apply og tax declaration niadtong tuig 2004.
Nadismaya usab sila tungod kay wala manumbaling kanila ang barangay council bisan man lang paghatag unta kanila og family food pack tungod sa rason nga wala matud pa’y labot sa demolisyon ang ilang barangay.
Duna matud pa’y gihatag nga relocation area ang lokal nga kagamhanan apan didto kini sa Brgy. Rizal kansa layo ra sa ilang panginabuhian nga mao ang pagpanagat.
