BUTUAN CITY- Minghapak na sa 14 ka indibidwal ang namatay human nahugno ang usa ka building sa Tripoli City, Lebanon, sumala sa taho sa Lebanese Civil Defense. Ang maong building nga nahimutang sa Bab al-Tabaneh, usa sa labing pobre nga lugar sa lungsod, nga gilangkuban og unom ka apartments.
Gibana-banang 22 ka tawo ang anaa sulod sa maong estruktura sa dihang nahitabo ang trahedya. Walo ka tawo ang nakaluwas ug nakagawas sa pagkahugno, apan human sa pipila ka adlaw nga operasyon, gitapos na sa mga otoridad ang search and rescue mission tungod sa kalisod ug risgo sa lugar.
Padayon karon ang imbestigasyon sa mga otoridad aron masuta ang hinungdan sa pagkahugno, lakip na ang posibilidad nga adunay kalabotan sa kahimtang sa estruktura ug sa socio-economic nga kondisyon sa komunidad.
Ang insidente nagpasabot sa kahuyang sa urban housing sa Lebanon ug naghatag og hulagway sa kahimtang sa mga residente nga nagpuyo sa mga lugar nga kulang sa seguridad ug imprastruktura.
