BUTUAN CITY – Taliwa nga karon nang Marso 29 sa-ulugon sa rebeldeng grupong New People’s Army (NPA) ang ilang founding anniversary, mas midaghan pa ang ilang mga sakop nga mibalik na sa sabakan sa gobyero human nga 13 ka mga NPA members ang boluntaryong mitahan ngadto sa 26th Infantry (Ever Onward) Battalion Headquarters.
Sa eksklusibong pakighinabi sa Bombo Radyo Butuan, gipadayag ni Major Francisco Garello Jr., Civil Military Operations kon CMO officer sa 402nd Brigade, Philippine Army, resulta kini sa hini-usang paningkamot sa Peace, Law Enforcement and Development kon PLED Support Team Clusters sa Municipal Task Force to End Local Communist Armed Conflict kon MTF-ELCAC sa mga lungsod sa San Luis, Esperanza, La Paz ug Talacogon, pulos sakop sa Agusan del Sur.
Sigon sa opisyal, 12 sa maong mga surrenderers mga membro sa Guerilla Front (GF) 88 sa North Central Mindanao Regional Committee (NCMRC) nga nag-operate sa maong mga lungsod samtang usa ang membro usab sa Guerilla Front 8, North Eastern Mindanao Regional Committee (NEMRC).
Ang ilang mga pa-it nga kasinatian samtang anaa uban sa grupo ug ang ilang kalisang nga magukdan sa tropa sa gobyerno ang nagtukmod kanila pagtahan na balik sa balaud.
Naglusad na ang 26th IB og custodial debriefing ngadto sa mga surrenderees ug iproseso pa sila alang sa enrollment nila sa Enhanced Comprehensive Local Integration Program (E-CLIP) benefits, usa ka programa sa gobyerno nga nagtinguha pagtabang sa mga mitahang rebelde aron mubalik ang ilang pagpanumpa ngadto sa gobyerno.
Bitbit sa ilang pagtahan ang tagduha ka M16A1, carbine rifles, ug homemade shotgun, tag-usa ka KG9, UZI Cobray, kalibre .38 ug kalibre 35 nga revolver uban sa nagkada-iyang mga bala, magazines, 3 ka kalibre .45 nga pistola ug uban pang mga war materials.
