BUTUAN CITY – Wala magdahom si Dondon Furog sa Sitio Bangkerohan, Barangay Tayud, lungsod sa Consolacion, lalawigan sa Cebu nga muresulta diay sa kaala-utan ang naghingapin niyang kalipay tungod sa pagkasikop ni Kingdom of Jesus Christ founder Pastor Apollo Quiboloy human nasunog ang iyang balay ug laing 12 ka mga balay sa iyang mga silingan.
Nasayrang nagdagkot og egg tray si Furog aron pang-abog unta sa lamok apan nalabay niya kini dihang nadunggan ang balitang nadakpan na si Quiboloy. Samtang anaa siya sa ilang pansayan sa taas nga bahin bitbit ang gidagkutang egg tray, nalabay niya kini sa ilang silong dayong karatil og dagan padulong sa ilang silingan aron pagkuha pa og dugang impormasyon.
Paglabay sa pipila ka minutos, nakurat na lang siya nga nagkagubot na ang ilang mga silingan hagtud nga iyang nakumpirmang mi-ulbo na ang dakong kalayo sa ilang lugar nga milamoy sa kinatibuk-ang 13 ka mga balay.
