BUTUAN CITY – Sama sa mi-aging May 2016 elections, wala’y nabag-o sa line-up sa Team RCL ning siyudad sa Butuan sa ilang subling pagdagan sa susamang mga posisyon alang sa May 13, 2019 midterm elections.
Sa pagpanguna ni incumbent Mayor Ronnie Vicente Lagnada, nagduso na sila sa ilang certificate of candidacy kaganinang buntag uban nila Vice Mayor Jose ‘Joeboy’ Aquino II og Butuan City og Agusan del Norte 1st District Rep. Lawrence Lemuel Fortun.
Ang ilang mga kandidato pagka-konsehal gilangkuban gihapon nila incumbent councilors Ferdinand Nalcot, Cromwell Nortega, John Gil Unay, Cherry Mae Busa, Omar Andaya, Atty. Remy Burdeos, Atty. Glenn Carampatana, Engr. Vincent Rizal Rosario, Ernest John Sanchez, og Derrick Plaza.
Alang kang Mayor Lagnada, ordinaryong adlaw lang ning adlaw nga nagduso siya sa iyang COC rason nga dili pa panahon sa pagpangampanya.
Tungod niini, kinahanglang trabaho una ang ilang unahon apan gipasalig niya sa katawhan nga prayuridad sa Team RCL ang pagpalambo ning siyudad. (Beth Ruiz)
