BUTUAN CITY – Luwas sa makuyaw nga kahimtang ang 12 ka Pilipinong seafarers nga sakay sa usa ka barkong giatake sa kadagatang sakop sa Iraq.
Kini ang gikumpirma sa Department of Migrant Workers (DMW) human makig-alayon sa mga awtoridad ug kumpanya sa barko.
Sigon ni DMW Secretary Hans Leo Cacdac, nakadawat ang ahensya og opisyal nga taho gikan sa mga shipowners nga nagpamatood nga anaa sa maayong kahimtang ang mga apektadong tripulante.
Gawas sa 12 ka seafarers, gipaneguro usab sa kalihim nga luwas ang anaa sa kapin 7-mil pa ka Pilipinong seafarers nga sakay sa nagkadaiyang barko dool sa may parte sa Strait of Hormuz.
Tungos sa insidente, subling nagpagaws og direktiba ang DMW aron pasidan-an ang mga Pilipinong tripulante mahitungod sa ilang mga katungod.
Gitumbok sa ahensya nga dunay opsyon ang mga seafarers nga balibaran ang pagsakay sa mga barkong nakatakdang molawig sa mga tag-as og risgo nga mga lugar.
Lakip sa mga gitumbok nga delikadong ruta ang Strait of Hormuz, Persian Gulf, ug Gulf of Oman.
Mahinumdumang una nang gideklara sa DMW ang mga nasangpit nga rehiyon isip war risk operations areas tungod sa padayon nga pag-init sa tensyon ug kagubot sa Middle East.
