BUTUAN CITY- Luwas nga na rescue ang tanang 12 ka pasahero ug tripulante nga sakay sa wooden hulled vessel kansa minglubog sa dagat duol sa Tawi-Tawi, apan lima kanila ang under close watch o nagpabiling gi-obserbaran sa usa ka ospital sa Bongao, sumala sa mga health officials.
Sumala sa Philippine Coast Guard (PCG) Sub-Station Simunul, ilang malampuson nga natubag ang insidente sa dagat nga naglakip sa motor banca Sitti Nur nga nilubog sa kadagatan sa Tawi-Tawi pasado alas-9 sa buntag niadtong Lunes.
Sa usa ka pamahayag, gibutya sa PCG nga nakasugat ang maong sakayang pandagat og kusog nga balod ug napartihan kini hinungdan sa pagka-unlod, nga nagbilin sa 12 ka pasahero ug tripulante nga naglutaw sa dagat.
Usa ka bidyo nga nakuhanan sa usa sa mga pasahero ang nagpakita sa kahimtang pipila ka minuto sa wala pa mabungkag ang sakayan tungod sa kusog nga balod, ug ang mga pasahero nagpabilin nga naglutaw samtang nagkupot sa mga debris.
“Ang tanang nakaluwas, luwas nga nakuha pinaagi sa panaghiusa nga paningkamot sa coast guard, maritime police, Philippine Marines search teams ug sa speed boat gikan sa Tawi-Tawi Provincial Office,” matod pa sa PCG.
Gikumpirma usab ni Dr. Sangkula Laja sa Integrated Provincial Health Office sa Bongao, nga sa 12 ka naluwas nga pasahero ug tripulante, lima lamang ang nag-pabilin sa ospital alang sa dugang nga obserbasyon.
Dugang pa ni Dr. Laja, nga ang tanan luwas ug gawas na sa peligro, nga walay seryoso o hulga sa kinabuhi nga kadaot.
