BUTUAN CITY – Mi-abot sa 12 ka pamilya ang namakwit sa pribadong bunkhouse kilid sa barangay hall sa Brgy. Bit-os ning siyudad sa Butuan tungod sa mga lanog nga buto ug mga paka-paka sa armas nga gitu-uhang mugna sa engkwentro tali sa mga rebeldeng New People’s Army kon NPA ug tropa sa militar kaganinang buntag.
Sigon sa usa sa mga namakwit nga si Raynelia Paduga, dali silang nanglugsong pasado alas siete kaganinang buntag dihang milanog ang gidudahan nilang gipabuto nga mga bomba sa ibabaw nga bahin sa Purok 14 padulong na sa lasang, aron dili matud pa mapagan.
Gikabalak-an nilang mukanaog sa Sitio Kauswgan ang naggiyerang duha ka panig rason nga sa 30 nila ka pamilyahan, 12 kanila ang wala’y duha duhang namakwit gilayon sa sentrong bahin sa ilang barangay.
Tungod sa pagdali-dali, daghan na kanila ang wala’y dalang mga sinina ug wala pa makasuot og tsinelas.
Sigon ni Nany Raynelia, ikaduha na niya kining bakwit nga tapot lawas ra uban sa ilang mga silingan tungod sa tumang kahadlok kondiin magpalabay una sila og gabii sa ilang gibakwitan adiser manguli og balik ugmang adlawa tungod kay nabilin matud pa ang ilang mga binuhing kahayupan.
