BUTUAN CITY – Dose ka mga indibidwal ning rehiyon sa Caraga ang gikonsidera karon sa Department og Health kon DOH nga ‘Persons Under Monitoring’ kon PUM human na-trace sa ilang travel history nga gikan sila sa Wuhan City ug ubang lugar sa China.
Sa eksklusibong pakighinabi sa Bombo Radyo Butuan, gipadayag ni Dr. Jose Llacuna Jr., regional director sa DOH-Caraga, nga sa dose ka mga PUMs, pito niinii mga Chinese ug lima ang mga Pinoy.
Iyang gipasabot nga lahi ang mga PUMs sa mga PUIs kon ‘Persons Under Investigation’ tungod kay ang ulahi duna na’y mga simtomas sa virus rason nga sila ang tutukan sa medical team ug kuhaan og blood o kaha swab samples aron ipakumpirma kung positibo sila sa maong virus o dili.
Gidugang ni Dr. Llacuna nga ang tanang musulod ning rehiyon nga masutang gikan sa mga nasud nga duna’y Wuhan coronavirus, ipa-ilalom gyod sa 14 ka adlaw nga kwarantina sa ingon masuta kung magpakita ba sila og simtomas sa virus o dili.
Higayong magpositibo, dalhon sila sa Caraga Regional Hospital sa Surigao City nga duna’y isolation room alang niini nga kaso aron didto tambalan.
Nasayrang gawas sa Caraga Regional Hospital duna usa’y isolation area ang Adela Sierra Te Memorial Hospital sa Tandag City.
Gitambagan niini ang mga pribadong ospital nga maggahin nang daan og isolation area aron duna’y madangpan ang mga pasyente higatong mu-abot ang panahon nga daghan ang magpa-checkup aron sutaon kung duna sila sa maong virus.
Gipaniguro sa director nga kontrolado nila ang sitwasyon rason nga wala matud pa’y angayang kabalak-an sa rasong gi-monitor na ang maong mga PUMs sa mga hingtungdang local health officials.
