BUTUAN CITY – Nagpadayon pa ang imbestigasyon sa mga sakop sa Butuan City Health Office ug sa contact-tracing team aron matumbok ang naghatag og clearance rason nga nakabiya gikan sa Masao Port sa Brgy. Lombucan ning siyudad sa Butuan, ang MV Tug Clyde ug Barge Claudia nga duna’y lulang 20 ka mga crew ug atua na karon sa kadagatang sakop sa Brgy. Lidong, Sto. Domingo, Albay.
Sa eksklusibong pakighinabi sa Bombo Radyo Butuan, gipadayag ni Butuan City government spokesperson Michiko de Jesus nga mi-abot sa Masao port ang maong tug boat niadtong Hulyo 14 gikan sa Indonesia karga ang carbon sa usa ka cement company sa Albay.
Gitin-aw sa opisyal nga dili taga-Butuan City ang na-hire nga molecular laboratory sa management sa maong barko alang sa swab test sa ilang mga tripolante kondili gikan sa ubang lugar ug ulahi na tungod kay dihang migawas ang resulta nga 12 sa mga crews niini ang COVID-19 positive, nakabiya na kini.
Nakig-alayon gilayon ang Butuan City government sa lokal nga kagamhanan sa Zamboanga City human nasayrang mipauli didto ang usa sa mga crews nga COVID-positive usab kansa dali matud pang na-extract ug na-isolate na.
Samtang dinhi sa Butuan City, nakuha ug na-isolate na usab ang mga personahe sa national government agencies nga misaka sa maong barko aron masigurong dili sila makatakod ilabina nga padayon pang gikumpirma ang mga kabalakang Delta variant ang mitapot kanila.
