BUTUAN CITY – Miabot sa 12 ka indibidwal ang nadakpan sa otoridad sa managlahing operasyon human nakalapas sa Commission on Election Gun ban, sa Malimono, Surigao del Norte karung adlawa atol sa piniliay.
Gibutyag ni Provincial Director (PD) Police Colonel Renato C Mercado nga ang pagkarekober sa mga armas og bala natigayon human gisumbong ang 8 ka armadong lalaki nga naka-standby sa lugar.
Giila ang mga suspects nga sila Bryan Canibel Sala, 40-anyos, residente sa Purok 5, Brgy. Binocaran, Malimono, SDN; Kieth Acelo Non, 39-anyos, taga Brgy. Alfonso, Tagaytay, Cavite; Michael Angelo Talosig Andres, 28-anyos taga 250 Brgy. 3, Aluminus, Laguna; Falcon Eral Sinaca, 50-anyos taga Brgy. San Isidro, Malimono, Surigao del Norte; Lino Sales Obre, 65-anyos taga Brgy Muzon, San Jose Del Monte, Bulacan; Ernesto Adloan Balopeños, 36-anyos taga Brgy. Poblacion, Brooks Point, Palawan; Julius Dalman Cabonce, 27-anyos residente sa Purok Sta Cruz, Brgy Duhinob, Dipolog City; ug Ricky Zabalero Banlas, 38-anyos ug residente sa Brgy. Magtangale, Balingoan, Misamis Oriental.
Kini pinaagi sa puwersa sa Malimono Municipal Police Station, 30th Infantry Battalion Philippine Army, 1305th MC Regional Mobile Force Battalion 13, Intelligence PCO, ug 1st SDN Provincial Mobile Force Company.
Nakumpiska sa operasyon ang usa ka M4 Caliber 5.56MM Commando Enhance rifle; usa ka M4 Carbine rifle; usa ka M4 rifle; tulo ka kalibre 45 nga pistola uban sa mga magazones ug bala; usa ka kalibre 9mm nga pistola nga dunay magazine og mga bala; 3 ka magazines sa kalibre 45 nga pistola nga dunay mga buhing bala; 5 ka plastic magazines sa Caliber 5.56MM rifle uban sa mga bala og usa ka aluminum magazine sa Caliber 5.56MM rifle nga dunay mga bala.
Sa laing bahin nadakpan usab ang 4 ka indibidwal sa gihimong checkpoint sa may Barangay Pili, Malimono, Surigao Del Norte. Nasayran nga duha ka motorsiklo nga dunay tag-tulo ka indibdiwal ang sakay ang kalit lang mihunong sa dihang anaa dool na sa checkpoint og ninaog ang 4 ka mga backriders. Sa dihang gidool sa kapulisan, ang usa sa mga niini naglabay og sling bag nga nasutang dunay sulod nga armas. Misulay pa pagsibat ang mga niini apan nadakpan sa otoridad samtang ang duha ka mga drivers ang padayon pang gipangeta.
Naila nga mga naaresto nga sila Abdulla Malic Sahalain, 26-anyos residente sa Lustre-Sta Catalina, Zamboanga City; Edgar Alba Diaz, 51-anyos taga San Vicente 1, Bislig City, Surigao Surigao Del Sur; Avenir Adelantar Lim, 42-anyos taga Lower Calarian, Zamboanga City; ug Junypeth Baroca Sumili, 34-anyos residente sa Purok Caimto, Ipil, Zamboanga Sibugay. Narekober gikan sa posisyon sa mga niini ang 2 ka punto 45 nga pistola uban sa tag-usa ka magazine og mga buhing bala lakip na amg 5 ka mga cellphones.
Gibitbit na ngadto sa Malimono Police Station ang mga nadakpan alang sa tukmang disposasyon samtang giandam ang kasong atubangon sa mga niini.
