BUTUAN CITY – Nagdumili na ang pamilya nga ipa-autosiya pa ang patay’ng lawas sa 12-anyos nga batang lalaki nga naghikog patay sa niaging mga adlaw sa may Barangay Bilay dakbayan sa Butuan.
Kini human nakumbinsi ang pamilya nga walay foul play sa kamatayon ni Raynel Castro Gabato, 12-anyos, kansa nakita nalang nga nagbitay sa punu-an sa kahoy nga wala nay kinabuhi.
Base sa imbestigasyon sa Butuan City Police Station-4, niadtong Mayo 26 mga alas 5:00 sa hapon, miabot sa panimalay ang inahan nga si Rena Ombod Castro nga dunay pinalit nga mga gamit pang-eskwela.
Apan nahiubos matud pa ang biktima human gi-angkon mismo sa inahan nga mas paborito niyang anak ang magulang nga igsoon niini.
Kalit lang matud pa nga milakaw ang biktima dala na ang pisi nga dunay gibana-banang katas-on nga 3 metros.
Gipangita kini sa inahan ug nakaplagan na lang nga nagbitay sa punu-an sa kahoy mga alas 10 na sa buntag, pagka-ugma. (Rolan Janea)
