BUTUAN CITY – Gikumpirma ni Commander Lawrence Roque sa Philippine Coast Guard-Surigao del Norte nga malampusong naluwas sa ilang mga ka-ubanan sa Dinagat Islands ang onse ka mga pasaherong sakay sa nabuslot nga service boat.
Sa eksklusibong pakighinabi sa Bombo Radyo Butuan, gipadayag Commander Roque nga natigayon kini kagahapon dihang palawig na ang maong bangka kansa dali ra usab nga naremedyuhan rason sa pagkaluwas sa tanang sakay niini apil ang mga tripolante og upat ka mga bata kinsa daling gidala sa pantalan sa lungsod sa San Jose.
Gidugang pa niini nga kagahapon pa sa alas-singko sa hapon nagpagawas na og gale warning advisory ang PAGASA rason nga gidid-an na nila pagpalawod ang mga gagmay’ng sakyanang pandagat. Tumong niini nga malikayan ang disgrasya sa kadagatan.
