BUTUAN CITY – Gitugutan na sa lokal nga kagamhanan sa Marihatag, Surigao del Sur ang ilang mga evacuees nga makapa-uli na sa ilang pinuy-anan tungod sa mimaayo na nga dagan sa panahon gikan sa hulgang hatud sa bagyong Auring.
Sa eksklusibong pakighinabi sa Bombo Radyo Butuan, gipadayag ni Municipal Disaster Risk Reduction and Management Office kon MDRRMO chief Gerry Avila nga ang tanan nilang 12 ka mga barangay duna’y mga bakwit tungod sa kataas sa tubig baha nga milapas na sa tawo kansa mao matud pa ang ilang pinaka-unang nasinatian.
Sa ilang pinaka-ulahing assessment, mi-abot sa 106 ka mga balay sa ilang lungsod ang totally damaged ilabina kadtong anaa duol sa suba ug baybay samtang 72 usab ang partially damaged.
Tambag niini sa mga namakwit nga susihon una og maayo ang ilang pinuy-anan ilabina ang ilang electrical outlets aron masigurong luwas ang ilang pagpauli tungod kay siguradong nasudlan kini og tubig.
