BUTUAN CITY – Gipusil-patay sa usa ka gunman ang dili mu-ubos sa 10 ka mga tawo apil na ang duha ka mga bata sa southern Montenegro ug sigon sa mga kapulisan, kadaghanan sa mga namatay, didto gipamusil sulod sa usa ka restaurant sa Cetinje area human naglalis ang mga bisita.
Nagdeklara og tulo ka adlaw nga nasudnong pagbangutan si Prime Minister Milojko Spajic kinsa mihulagway sa maong pagpamusil isip usa ka makalilisang nga trahedya. Gipatay sa gunman ang mga membro sa iyang pamilya, duha ka mga anak sa tag-iya sa restaurant, apil na ang mismong tag-iya.
Gitawag usab ni Interior Minister Danilo Saranovic ang maong insidente nga resulta sa nabalda nga interpersonal relations kondiin duna pa’y natalang upat nga anaa sa kritikal nga kondisyon.
Ang attacker nga si Aleksandar Martinović, 45-anyos, misibat sa dapit nga nahitabuan ug gipusil niini ang iyang kaugalingon dihang gipalibutan sa mga pulis ug gimanduang ihulog ang iyang armas.
