BUTUAN CITY – Gikumpirma ni Lt. Col. Francisco Molina, Battalion commander sa 23rd Infantry Battalion, Philippine Army nga 10 na ka patay’ng lawas sa mga rebeldeng New People’s Army kon NPA ang ilang narekober sa nagpadayong engkuwentro nga mi-ulbo sugod pa niadtong Domingo, Mayo 10 sa utlanan sa Agusan Del Norte ug Misamis Oriental.
Sigon pa ni Lt. Col. Molina, unang natigayon ang engkwentro sa Sitio Likudon, Barangay Kamanikan sa Gingoog City, Misamis Oriental kansa maoy utlanan sa lungsod sa Las Nieves, Agusan del Norte.
Gihimo ang operasyon human nakadawat og taho gikan sa residente mahitungod sa 70 ka armado nga nasutang mga rebelde ilalom sa Guerrilla Front 4A.
Gibana-banang alas 4:00 sa buntag dihang miabot ang tropa sa lugar og gipa-ulanan sila ug bala sa mga rebelde rason sa natigayong engkuwentro nga milungtad og 15 minutos.
Sa nakuhang impormasyon, narekober kaganinang buntag ang napulo ka mga patay’ng lawas nga gipahiluna na sa duha ka punerarya sa Gingoog City.
Lakip sa nakuha sa tropa ang lima ka high-power firearms, mga bala, landmines, cellphones, ug subersibong documento.
Sa karun padayon pa ang hot pursuit operations batuk sa mga rebelde nga nanibat sa nagkalain-laing direksiyun apan giklaro ni Molina nga ma-ampingon ang ilang tropa tungod kay dunay mga gitanom nga mga bomba ang NPA.
Samtang ang Philippine Air Force kon PAF, naghatud usab og dugang mga sundalo sa nasangpit nga lugar.
Sa pamahayag usab ni Brig. Gen. Maurito L. Licudine, 402Bde commander, gidayeg niini ang tropa sa 23rdIB sa malampusong military operations sa lugar.
Sumala pa ni Licudine nga makonsidera kining running gun battle tungod kay madungog pa ang mga buto sa armas sa maong dapit.
Tungod niini, lauman matud pang daghang NPA casualties ilabina kay gisuhid karun sa tropa ang mga utlanan sa Agusan del Norte ug Misamis Oriental sa paggukod sa nahabiling NPA combatants.
