BUTUAN CITY – Gikumpirma sa Department of Health kon DOH-Caraga sa alas 6:30 sa sayung gabii, nadawat sa buhatan ang RT-PCR Confirmatory tests results gikan sa Research Institute for Tropical Medicine kon RITM diin usa ka sample ang nag-test Positive sa COVID-19.
Kini usa ka 10-anyos nga batang babaye gikan sa Butuan City kansa walay signs and symptoms, ug walay travel history; apan dunay close contact sa indibidwal nga mitambong sa Araw ng Dabaw six-cock Derby sa New Davao Matina Gallera sa nakalabay nga Marso.
Sigon ni DOH-13 Regional Director Jose R. Llacuna, Jr, ang kumpirmadong kaso mao ang usa sa unom ka samples sa ikatulong batch sa Rapid Antibody Tests kansa nagpositibo sa immunoglobulin Antibody, nga gihimo sa local government sa Butuan City diin ang laing lima nag-test Negative sa RT-PCR Test.
Ang ika-upat nga batch sa samples napadala na sa nakalabay nga adlaw, Abril 21, 2020 ngadto sa Southern Philippines Medical Center kon SPMC.
Sa karun, ang Butuan City duna nay natala nga tulo ka kumpirmadong kaso diin ang usa nakuha sa Manila samtang ang duha, na-exposed sa indibidwal nga miapil sa public event sa Davao.
Tungod niini nga data, ang DOH Caraga dunay hugot nga monitoring sa transmission status sa siyudad. Sumala pa ni Llacuna, nakig-alayon na sila sa Butuan City pinaagi sa team ni Mayor Lagnada alang sa pagmaneho sa kaso lakip na usab sa ubang Local Government Units alang monitoring, surveillance ug reporting sa COVID-19 suspect cases.
