BUTUAN CITY – Gikondena sa 29th Infantry “Matatag” Battalion, Philippine Army ang Communist Terrorist Group sa kalapasan niini sa International Humanitarian Law human gipabusikad ang landmine atol sa engkuwentro nga natigayon sa Sitio Pinamugaan, Brgy. Bangonay, Jabonga, Agusan del Norte sa nakalabay nga adlaw.
Ang maong pabusikad sa bomba miresulta sa pagka-angol sa usa ka sundalo nga na-igo sa shrapnels.
Natigayon ang engkuwentro sa dihang miresponde ang tropa sa gihatag nga impormasyon sa mga sibilyan nga dunay nangikil nga 10 ka rebelde nga gikatahong miyembro sa Sentro De Grabidad 16, Guerilla Front 16, Northeastern Mindanao Regional Committee, target niini ang mga minero sa bukirang parte sa Brgy Bangonay, Santiago, Agusan Del Norte.
Narekober usab sa mga sundalo ang nagkadaiyang bala og subersibong dokument nga nabilin sa pagsibat sa mga rebelde human ang 5 ka minutos nga engkuwentro.
Anaa na sa luwas nga kahimtang sa karun ang nasamdan nga sundalo human nadala usab sa pinakadool nga ospital.
Samtang padayon ang Hot Pursuit operations batuk sa nanibat nga mga rebelde.
Sa nahimong pamahayag ni 29IB Commanding Officer Lt. Col. Cresencio C. Gargar gipaneguro niini nga magpadayon ang ilang gihimong focused military operations bisan paman sa ilegal nga pagpangatake sa kalabang grupo.
