BUTUAN CITY – Gipaningkamutang mapanaog na gikan sa bukirang parte sa Barangay Mahagsay, lungsod sa San Luis, Agusan del Sur ang patay’ng lawas sa usa ka rebeldeng New People’s Army kon NPA human ang engkuwentro kagahapon sa alas 11:00 sa buntag.
Sa pakighinabi ning sibyahan kang 2nd LT. Rommel Arnado, CMO Officer sa 26th Infantry Battalion, Philippine Army, gikumpirma niini nga dunay nakalas sa pikas grupo human sa 30 ka minutong pagbinaylo-ay ug bala apan wala pa kini makanaog tungod sa daot nga panahon diin dili pwedeng makatugpa ang chopper nga maoy mas daling makakuha niini.
Paningkamutan nila nga kini manaog na kini aron mailhan ug mabalik sa iyang kabanay.
Giklaro usab sa opisyal nga natigayon ang engkuwentro tungod sa nadawat nilang impormasyon gikan sa nagpakabanang sibilyan nga dunay armadong grupo nga gustong mu-atake sa patrol base nga nakabase sa maong lungsod.
Nakumpiska sa encounter site ang 1 ka M4 riffle, AK47, 6 ka backpacks, Assorted medical supplies, mga personal nga gamot ug mga sobersibong dokumento nga iya sa NPA.
Gilusad karun ang hot pursuit operation sa militar batuk sa misibat nga mga rebelde nga sakop sa Guerilla Front Committee 88 sa (NEMRC) kon North Eastern Mindanao Region Command. (Rolan Janea)
