BUTUAN CITY – Gitoohang tungod sa kadanlog sa dalan hinungdan sa disgrasya nga natigayon kaganinang alas 7:30 sa buntag sa national highway sa Purok Narra, Barangay Quezon, Surigao City diin usa ang patay samtang usa ang kritikal.
Giila ni P/ SUPT. Deomedes Cuadra jr, hepe sa Surigao City Police Station, patay ang biktima nga si Jimmy Rico Palibre, 37-anyos samtang kritikal ang kauban niini nga si Renato Felecio nga parehong residente sa Sison, Surigao Del Norte.
Sumala sa opisyal, sakay ang mga biktima sa Toyota Hi-lux nga dunay plaka numero MGB 146 sa dihang nag-overtake kini sa usa ka motor.
Tungod sa danlog nga dalan nga pun-an pa sa kapaspas sa dagan, wala na kontrola sa drayber nga si Palibre ang manubela nga miresulta sa pagkabalintong niini sa tunga sa dalan.
Dili ti-aw nga mga samad ug pangos sa kalawasan ang na-angkon sa mga biktima hinungdan sa kamatayon sa drayber samtang kritikal usab ang kauban niini nga anaa karun sa balay tambalanan.
