BUTUAN CITY – Patay ang usa ka menor de edad nga driver sa motorisiklo samtang nagrabehan ang angkas niining babaye human nadasmagan sa usa ka dump truck didto sa Brgy. Upper Tagabaca, ning siyudad sa Butuan kagahapong adlawa, Friday the 13th.
Sa pakighinabi sa Bombo Radyo Butuan, gipadayag ni Police Captain Rodel Durado – hepe sa Butuan City Police Office Station 4, naka-angkon og fatal injuries ang driver nga gitago sa pangalang “Ras”, 17- anyos ug taga Purok 1 Brgy. Salvacion sing syudad kinsa nadala pa sa balay tambalan apan gideklara gilayong dead on arrival sa attending physician samtang under observation pa apan luwas na sa kritikal nga kahimtang ang 14-anyos nga dalagitang sakay niini.
Sigon sa opisyal padulong unta Mag-Chirstmas party ang pulos grade 8 nga mga biktima kinsa parehong magtutungha sa Pigdaulan National High School kondiin pasulod na unta sila sa national highway subay sa subidahong bahin apan na-alanganin ug ni-atras ang motorsiklo hinungdang nakumot sa driver ang accelerator resulta sa pag-abante niini.
Wala niya nabantayan sa duha nga padulong kanila ang dumptruck nga gimanihuan ni Francisco Palacar taga-Brgy. Tungao, ning siyudad kinsa kusog nga nagpadagan rason sa pagkadasmag niini og pagkalabog sa mga sakay sa motorsiklo samtang nalatayan pa sa dumptruck si Ras nga gipanag-iyahan sa Adfil Corporation.
Daling mitahan sa iyang kaugalingon ang suspek human nakita ang presenya sa kapulisan niadtong mga panahona samtang mihatag na og inisyal nga assistance ang maong construction company ngadto sa pamilya sa namatay ug sa biktimang anaa pa sa balay tambalanan.
