BUTUAN CITY -Nadakpan na sa kapulisan sa Kitcharao, Agusan del Norte ang tulo ka mga responsable sa pagpanulis sa usa ka kan-anan sa Purok 6, Brgy San Roque, pasado alas-4:15 ang takna kagahapon sa kaadlawon nga mikalas sa usa ka tindera ug mi-angol pa sa laing duha. Gipresenta na ngadto sa publiko ang mga responsable kinsa nakuhaan sa ilang dalang mugbo ng kalibre sa armas uban sa mga bala, cellphones apil na ang ilang gisuot nga tukma sa kuha sa CCTV footage.
Gi-ila ni PSSg Josephus Javerle, duty investigator sa Kitcharao Municipal Police Station, ang mga responsable nga sila Raymond Dadong, Raynaldo Dadong ug Roland Dadong, lumad nga taga-Jabonga, Agusan del Norte ug kasamtangang nagpuyo sa Brgy. Cawilan, lungsod sa Tubod, Surigao del Norte.
Samtang ang mga biktima nailang sila Genalyn Cabar Apolinario, 54-anyos, ang gipusil-patay, anak niining si Evangeline Cabar Apolinario, 31- anyos ug si Salvador Abad Junio, 65-anyos, Brgy. Captain kinsa maoy tag-iya sa tindahan, pulos residente sa maong lugar.
Migawas sa inisyal nga imbestigasyon nga kalit lang nangabot sa maong carenderia ug refreshment store, ang tulo nga naka-bonnet ug armado, dayong deklara og tulis ug gipusil gilayon si Genalyn resulta sa hinanali niining kamatayon. Daling misibat ang mga responsable sakay sa motosiklo bitbit ang gibana-banang ₱30,000.00 nga kita sa tindahan.
Apan daling gisubay sa kapulisan ang maong hitabo uban sa tabang sa CCTV footage hinungdan nga dihang nakita nga ha-um ang jacket ngagigamit sa tulisan ug sa gipanubayan sa kapulisan, dali silang gipangsikop.
